Ʋʋ bla 'ʋn ‑pa "kpei
17
Dafi 'a baewlu‑.
Tʋ "bo, ‑po' 'ma baewlu doun" o, dɛ ‑nʋɛ ɛ "srɛi.
‑Ɩn ‑wɔn 'ma "wɔwlu‑, ‑te' doun" 'de 'ma baewlu 'a ‑tɩ' 'ʋn.
Nyʋ 'srɛi pooa' se 'e 'ma mɩɩɔ "kpei nɩ‑.
2 ‑Ɩn ji ‑tɔ' ‑tɩ ‑jea 'ʋn ‑seie 'tmʋ
‑wɛe tɔ' ‑tɩ 'je "kpae 'pɛɛn 'de ‑ʋn "juɛi.
3 ‑Bo ɛ "jrɛɛ 'ma pɛe, ‑bo ɛ pleɛɛ "jriɛ o "maʋ,
‑bo ɛ ‑tɩn' 'mii, ɛ se dɛ deejrɛ' 'jei.
Dɛ ‑ɛɛ wlu 'ɩn cɛan ‑tie"
ɛmɛ ‑nɩ dɛsaʋn se' 'ʋn 'wɔn jii.
4 Ka nyʋ ‑sia 'e mu 'je ʋʋ nʋ mɔ 'de ɛ,
wlu ‑wlʋa 'de ɛ 'wɔn ɔɔ
tɛɛn 'ʋn nyʋsaʋn 'a ‑jeblʋ kɩɩn.
5 'Ɩn nyna ‑sisi 'de ‑ma ‑jei", 'ma bɩ se crɛi.
6 Kea, 'ma 'da ‑ʋn ‑ɛ dɛ ‑nʋɛ,
‑ma kpʋn ɛ 'ma baewlu‑,
‑Ɩn ‑te' doun" ‑ɩn po 'ma baewlu doun" o.
7 ‑Ɩn ‑to ‑ma 'diwɔnmɔa'
'de nyʋ ‑ʋʋa ‑wlaa' ‑ʋn "jru bɩ' ‑pee.
‑Mɔ ‑ɔɔ ‑seie nyʋ ‑ʋʋa ‑wlaa' ‑ʋn
"jru bɩ' 'de ʋʋa' tʋnyʋ 'kwa'.
8 ‑Ɩn ‑tu" 'ma ‑tɩ' ka "jriɛ 'ɛ saʋn nɩa,
‑ɩn ‑tu" 'ʋn 'kwla 'de ‑ma nai ‑sɔn.
9 'De 'diwɔnyniiʋn ‑a ‑tua" 'ʋn 'kle o,
'ma tʋnyʋ ‑pian' 'ʋn 'kwa.
10 Ʋʋ kmuɛ pɛe "i,
‑cɛi" 'bɛa' ‑nɩ 'e ʋʋa' wlu 'di.
11 Ʋʋ nɩɛ 'ʋn 'dei, ʋʋ ‑pin' 'ʋn 'ɛ,
ʋʋ ‑teɛ 'ma iblaa' kein" ke.
12 Ʋʋ ‑kɔ' ‑plaa ‑ɛ ‑te kein" ke ‑ɛ ‑je dɛ i 'fae‑
ka kpʋʋn nmii ‑ɛɛ naa dɛ ‑sɔn nɩa.
13 ‑Sɔn 'ʋn Tʋ "bo, ‑ɩn kpʋn ʋʋpʋ‑,
‑ɩn ‑tu" ʋʋpʋ‑ 'blʋɔ‑. ‑Ɩn nʋ ‑ma ‑placnɛ,
‑ɩn ‑je 'ʋn ‑seie 'de 'diwɔnyniiʋn 'kwa.
14 Tʋ "bo, ‑ɩn ‑seie 'ʋn 'de 'blʋadinyʋ ‑nʋ 'kwa,
‑ʋʋa ‑nɩ crɔn' nɩa 'de 'kmʋ ‑nɛ "kpei ɛ,
‑ɩn ‑nyɩ" ʋʋpʋ‑ dɩ ‑tuu" ‑tuu ʋʋ
'je dbo ‑wɛe ʋʋ 'je ɩa' tɔe ʋʋa' "nynuu‑ "nyɩ.
15 'De 'mɔ ɛ, ‑ɩn nʋɛ 'ʋn "isrɛi 'ʋn
‑wɛe 'ɩn 'je ‑ma "juua "jriɛ 'jee‑.
‑Bo 'ɩn sɔn "nyɩɔ' ‑ma ‑suu 'je 'ʋn "ji.